Patungkol kay Babaylan Tata Adlaw

Ako si Tata Adlaw, isang Babaylan at Reiki Master. Isa rin akong tarot reader, astrologer, at numerologist. Nagsimula ang spiritual journey ko noong pitong taong gulang pa lang ako, nang magkaroon ako ng unang vision. Madaling araw noon, pauwi kami ng Maynila mula Bicol nang bigla kong maramdaman na mababangga ang sinasakyan naming bus. Sa kasamaang palad, nangyari nga ito at muntik nang mahulog sa bangin ang bus namin.

Naulit ito noong high school ako. Pauwi kami ng kapatid ko mula Quezon City papuntang Cavite nang bigla kong makita sa vision ko na tatama ang ulo ko sa windshield ng jeep. Hindi ko pinakinggan ang kutob na iyon at umupo pa rin ako sa harap. Nang malapit na kami sa aming bababaan, sumalpok ang sinasakyan namin sa poste ng ilaw matapos umiwas ang aming driver sa isang minibus na nag-overtake. Tulad ng nakita ko sa vision, tumama ang ulo ko sa windshield at nagkaroon ako ng maliit na galos. Dahil dito, mas lalo akong nakumbinsi na may natatangi akong kakayahan.

High school ako noon nang magsimula akong mag-ipon ng mga newspaper clippings tungkol sa esoteric arts (wala pa kasing internet noon). Nakakagulat din na parang kusa lang dumarating ang mga bagay na kailangan ko. Halimbawa, may kaklase ako noong second year na nagbigay sa akin ng oracle cards, at may isa rin na nagpahiram ng spell books. Dahil wala pang gumagabay sa akin noon, nakagawa ako ng ilang ritwal na hindi naging maganda ang kinalabasan at nagdulot ng kamalasan sa aming pamilya. Pero sa gabay ng naging mentor ko noon, natutunan kong gamitin nang tama ang karunungan at kakayahan ko para sa sarili kong pag-unlad at para rin guminhawa ang buhay namin.

Lumaki din akong nakikita ang lola ko na nanggagamot. Yung lola ko sa father side ay isang mangagamot sa kanilang lugar. Dahil dito, nagkaroon din ako ng interes sa panggagamot. Tanda ko pa noon na ginagawa ko ang ginagawa ng lola ka na nagpapausok ng inseso kamngyan tuwing Biyernes para magtaboy ng masasamang ispirito. At nang mamatay ang lola ko, nagsimula na rin akong manggamot sa aming lugar nang walang bayad. Kalaunan, natuparan (initiated) ako bilang isang Babaylan at nakatanggap ng Reiki attunements hanggang sa maging isang Reiki Master.

Dahil na rin sa hilig ko sa bagong kaalaman, pinag-aralan ko ang iba’t ibang paraan ng pagtatagna tulad ng palmistry, astrology at numerology. Malaking tulong ito sa akin dahil sa ganitong paraan ko unti-unting naaabot ang mga pangarap ko para sa sarili at pamilya. Marami akong nagawang pagkakamali noon, pero nakabangon ako dahil sa mga aral at karunungang nakukuha ko sa bawat reading na ginagawa ko.

Nakita ko ang positibong epekto nito sa buhay namin. Paunti-unti kong naibibigay sa pamilya ko ang komportableng buhay na kailangan nila sa tulong ng trabahong nagbigay sa akin ng maayos na income, ang digital marketing. Bagamat wala akong pormal na educational background noon, nakuha ko ang trabahong ito sa tulong ng pagtatagna at sa mga ritwal na ginawa ko upang maalis ang mga balakid sa landas ko. Dahil din dito, at sa patnubay ng Lumikha, nakabalik ako sa pag-aaral at malapit ko nang matapos, ang kursong BS Pharmacy. Pangarap ko talagang maging doktor para mas matulungan ko ang aking pamilya, lalo na ang aking ina na may karamdaman. Bukod sa kaalaman ko sa spiritual healing, gusto ko ring gamitin ang siyensya sa pagpapagaling ng sakit.

Nakita ko ang positibong epekto nito sa buhay namin mula pa noong 2010, kaya gusto ko ring tulungan ka na mahanap ang direksyong tunay na makapagpapaligaya sa iyo. Hindi ako naniningil nang sobra dahil may full-time job naman ako. Kaunting bayad lang bilang “sanag” o energy exchange. Sinusunod ko ang mga prinsipyo at ethics na natutunan ko mula sa mga pagkakamaling pinagdaanan ko noon. Makakaasa kang pananatilihin kong pribado at may respeto ang lahat ng impormasyong ibabahagi mo sa akin. Maaari mo rin akong makontak anumang oras sa email o sa WhatsApp ko.