Traditional Healing sa Pilipinas

Bago pa dumating ang mga dayuhan, meron ng sariling paraan ng pagpapagaling ang mga ninuno natin. Ang tawag sa kanila noon ay babaylan. Hindi lang sila manggagamot, kundi sila rin ang spiritual leader at tagapamagitan ng tao at mundo ng mga espiritu.

Habang lumilipas ang panahon, nagbago rin ang anyo ng panggagamot sa Pilipinas. Dumating ang mga albularyo, manghihilot, medico, at faith healers na ngayon ay kinikilalang tagapagpatuloy ng kaalaman ng mga babaylan sa iba’t ibang komunidad. At kahit may mga ospital na at modernong doktor, marami pa ring Pilipino ang bumabalik sa traditional healing dahil sa malalim na tiwala sa bisa nito.

Albularyo

Sa mga probinsya, madalas ang albularyo ang unang nilalapitan kapag may karamdaman. Para silang general practitioner ng traditional medicine. Gumagamit sila ng halamang gamot, dasal, orasyon, at ritwal para magpagaling. Maraming albularyo ang nagmana ng kakayahan mula sa pamilya. Pinaniniwalaang ang kanilang kapangyarihan ay galing sa Espiritu Santo o iba pang spiritual guides.

Manghihilot

May dalawang uri ng hilot sa traditional healing:

• Magpapaanak – Tumatanggap ng buntis na walang access sa ospital. Marunong sila sa halamang gamot para sa prenatal at postnatal care.
• Hilot sa katawan – Tinutulungan ang mga may pilay, lamig, o pananakit ng katawan. Madalas silang gumagamit ng langis ng niyog at mga dahon habang minamasahe ang katawan ng pasyente.

Medico

Ang medico ay pinagsamang traditional at modernong manggagamot. Bukod sa orasyon at halamang gamot, gumagamit din sila minsan ng gamot mula sa botika, acupuncture, o injection depende sa pangangailangan ng pasyente.

Mangluluop

Sa ritwal ng luop, pinagsasama ang kalanghuga (uri ng kabibe), asin, benditang palaspas, uling, at tingting sa isang lata. Pagkatapos pausukan ang pasyente, tinitingnan ang anyo ng kalanghuga para malaman kung anong karamdaman ang naroon o kung may spiritual na dahilan ang sakit.

Magtatawas

Ginagamit ang tawas para alamin ang pinagmulan ng sakit. Karaniwang sinusunog ito sa kandila o nilalagay sa tubig, tapos binabasa ang hugis na nabubuo. Mula sa hugis, binibigyang-kahulugan kung ano ang sanhi ng sakit.

Manghihila

Gumagamit ng langis ng niyog, tela, at minsan dahon ng saging para makita kung may pilay o lamig sa katawan. Kapag dumikit ang dahon sa balat at mahirap itong hilahin, senyales ito na may bara o problema sa parteng iyon. Pagkatapos, minamasahe ito ng manghihila para maibsan ang sakit.

Faith Healers

Ang mga faith healer ay naniniwala na may spiritual gift sila para magpagaling ng iba. Iba-iba ang paraan nila ng panggagamot:

• Psychic healers – Sinasabing kaya nilang gamutin ang isang tao kahit nasa malayong lugar ito.
• Whisperers of prayers – Nagdarasal habang binubulungan ang masakit na bahagi ng katawan.
• Prayer blowers – Iniihipan ang pasyente habang nagdarasal.
• Anointers – Pinapahiran nila ng laway ang bahagi ng katawan na masakit.
• Gumagamit ng krus o imahen – Ipinapahid o inilalapit nila ang krus o imahen sa katawan ng pasyente bilang panlunas.
• Psychic surgeons – Pinaniniwalaang kayang operahan ang pasyente gamit lamang ang kanilang mga kamay, walang surgical tools.

Hanggang ngayon, buhay na buhay pa rin ang traditional healing sa Pilipinas. Hindi lang ‘to dahil sa kakulangan sa access sa ospital, kundi dahil naniniwala pa rin ang marami sa galing at karunungan ng mga ninuno natin.